Skjaldvararfoss er gamalt bændabýli á Barðaströnd. Sumarhúsið stendur á fallegum stað við sjóinn með einstakt útsýni yfir Breiðafjörð. Gömlu húsin á Skjaldvararfossi standa rétt hjá og hafa verið aðdráttarafl margra myndasmiða síðustu ár. Við viljum biðja fólk að fara EKKI inn í gömlu húsin vegna slysahættu. Draumurinn er að gera upp hluta af gömlu húsunum og gera umhverfi þeirra aðeins snyrtilegra. Fjaran er aðeins örfáa metra frá sumarhúsinu, þar er hægt að fara í gönguferðir, gera sandkastala og finna fallegar skeljar. Stundum er hægt að sjá seli svamla í sjónum framan við húsið. Í bústaðnum er hægt að láta fara vel um sig hvernig sem viðrar, ef veðrið er gott er um að gera að grilla og borða úti á palli en ef er vindur er úti eða rigning hægt að elda eitthvað gott inni. Þá er líka notalegt að slaka á og hlusta á brimið í sjónum sem heyrist oft vel inn. Eins er hægt að setja timbur í kamínuna og lesa bók eða spila.

Elín og Kristján eru starfandi bændur á Breiðalæk sem er í um 2 km. fjarlægð frá Skjaldvararfossi. Þar eru þau með 80-90 nautgripi, þar af um 30 mjólkandi kýr. Einnig eru á bænum nokkrar kindur og nokkrar hænur. Kristján er smiður og vinnur við það í hjáverkum en Elín hefur verið að prófa sig áfram með að súta skinn.